Izaera propioa dugu Gipuzkoako Eskola Txikietan eta azken ikasturteetan hartutako lan ildo nagusiekin sortu zaizkigun erronkei erantzuten jarraitu nahi dugu etorkizunean. Horretarako koordinatuta lanean aritzea ezinbesteko baldintza dugu.
Ildo desberdinak hartu ditugu urteen joanarekin, lan ildo bakoitzak interes, behar eta erronka ezberdinei eusten dion arren, guztiek eskolen arteko hartu emana bizirik mantentzea eta indartzea dute helburu. Eskola Txikietan betidanik eman izan zaio garrantzi berezia interakzioari eta elkarlanari, ba, berez eskolen barruan ematen den horri beste interakzio eta elkarlan baten indarra gehitu nahi diogu koordinazio honi esker, eskolen arteko interakzioa eta elkarlana, hain zuzen ere.
Koordinazioaren xede nagusia, beraz, Eskola Txikien mugimendua indartzea da, Eskola Txikiak bizirik egotetik, bizirik eta bizitzaz beterik egotera pasatzea, hain zuzen ere. Horretarako, oraingo egoerari buruzko hausnarketa sakona bultzatuko dugu, azken ikasturteetan egindako ibilbidearen ebaluaziotik ateratako ondorioei irtenbideak ematen saiatuko gara, antolaketa sendotzea eta bide berriak jorratzea ezinbestekoa izango delarik. Izan ere, urte asko dira elkarrekin lanean ari garela eta denbora horretan aldaketa handiak gertatu dira: eskoletan, herrietan, irakasleria, ikasleak, gurasoak, eskolari eskatzen zaiona … Nor garen eta nolakoak izan nahi dugun erantzun beharko dugu guztion adostasuna lortuz.
Gipuzkoako Zuzendariak
Gipuzkoako Eskola Txikietako 26 Zuzendariak 3 taldetan elkartuko dira:
- Kostaldeko taldea
- Tolosaldeako taldea
- Goierriko taldea
Antzeko funtzionamendua izango dute lan taldeek. Hilabetean behin bi edo hiru orduko lan saio bat egingo da, eta berta, aurrez adostutako gaien lanketa egingo da. Horretarako dinamika desberdinak bultzatuko dira: talde txikietako lana, talde handiko lana, gogoetarako tarteak, dokumentazioen lehen borradoreak osatzea, formazioaren jarraipena egitea ...
Bestalde, hiruhileko bakoitzean, 26 Zuzendariak elkartzeko Topaketa bat antolatuko da Lasarte Oriako Berriztegunean. Topaketa horren lan estiloa desberdina izango da.
Batzorde Anitza
Gipuzkoako Eskola Txikietako irakasleen koordinazioaren eta Guraso Elkarteen Koordinakundearen arteko elkarlanean oinarritzen da Batzorde honen urteko zeregina. Gai ezberdinak tratatzeko aukera ematen duen arren, nagusiki ondorengo gaiak tratatzen dira:
- Eskola Txikien egoera orokorrean.
- Eskola Txikien Festaren nondik norakoak.
- Gurasoen Jardunaldiaren ingurukoak.
- Sortzen diren bestetako kezka eta gaiak.
Araba eta Bizkaia
Arabako eta Bizkaiko Eskola Txikiekiko harremanak ere badira, noski. Zuzendarien mintegiak egiten dira Gasteizko Berritzegunean Arabako 5 Eskola Txikiekin eta Zaratamon Bizkaiko 20 Eskola Txikiekin.
Hilabetean behin bi edo hiru orduko lan saio bat egingo da, eta bertan, aurrez adostutako gaien lanketa egingo da. Horretarako dinamika desberdinak bultzatuko dira: gogoetarako tarteak, dokumentazioen lehen borradoreak osatzea, formazioaren jarraipena egitea ...
